Guddiga Dib U Eegista Dastuurka oo la horgeeyay Golaha Shacabka
Wasiirka Caddaaladda & Arrimaha Dastuurka ee Xukuumadda Federaalka, Xasan Macalin Maxamuud ayaa maanta Guddiga Madaxabannaan ee Dib U Eegista & Hirgelinta Dastuurka KMG horgeeyay Xildhibaanada Golaha Shacabka, isagoona ka codsaday inay kalsoonidooda siiyaan.
Guddigan oo ka kooban 5 xubnood ayaa waxaa 2-dii bishan ansixiyay Golaha Wasiirada, ka dib markii uu soo gudbiyay Wasiirka Caddaaladda & Arrimaha Dastuurka.
Wasiirka oo hadal ka jeediyay Xarunta Golaha Shacabka ee Villa Hargeisa ayaa sheegay in xubnahan ay soo buuxiyeen shuruudihii looga baahnaa, isla-markaana ay muhiim u yihiin sida uu yiri shaqadaasi dastuuriga ah.
Gudoomiyaha Golaha Shacabka, Aadan Maxamed Nuur (Aadan Madoobe) ayaa Xildhibaanada ugu baaqay inay cod u qaadaan, haddii ay ansixinayaan xubnahaasi iyo haddii kaleba.
143 Xildhibaan ayaa ugu dambayn qaab gacantaag ah ku meelmariyay Guddiga Madaxabannaan ee Dib U Eegista Dastuurka Qabyo Qoraalka, mana jirin cid diiday amaba ka aamustay.
Xubnaha Guddiga Madaxbannaan ee Dastuurka ayaa kala ah:-
Maxamed Xasan Idiris
Axmed Maxamuud Jaamac
Maxamed Cabdalla Saalax
Farxiya Muumin Cali
Burhaan Aadan Cumar.